Arab koalitsiyasining Yaman shimolidagi Saada provinsiyasiga aviahujumi oqibatida 11 kishi halok bo‘ldi. Bu haqda Sputnik agentligiga tayanib, “RIA Novosti” xabar bermoqda.
Bombalar Kitaf munitsipalitetidagi qishloqqa tushgan. Halok bo‘lganlarning aksariyati ayollar va bolalardir. Shuningdek, aviatsiya mamlakatning sobiq prezidenti Ali Abdullo Solihning safdoshi general Maxdi Makvalning Sana provinsiyasidagi uyiga ham zarba bergan.
BMT ma’lumotlariga ko‘ra, 26-martdan beri Yamanda 1670 nafar tinch aholi qurbon bo‘ldi, 3829 nafari yaralangan.

Jazoir armiyasi mamlakat shimolidagi Ayn-Defla provinsiyasida xavfsizlik kuchlari xodimlariga hujumdan so‘ng o‘tkazilgan amaliyot chog‘ida 16 nafar terrorchini yo‘q qildi. Bu haqda Sky News Arabia telekanaliga asoslanib, “RIA Novosti” xabar bermoqda.
Foto: “RIA Novosti”
Telekanalning ta’kidlashicha, o‘ldirilganlar orasida chet ellik fuqarolar ham bo‘lgan. Harbiylar, shuningdek, qurol-aslaha, o‘q-dori va portlovchi moddalarning yirik miqdordagi zaxiralarini aniqlagan.
Eslatib o‘tamiz, 18-iyul, shanba kuni jangarilar Ayn-Defla provinsiyasida harbiy karvonga uyushtirgan hujum oqibatida 9 askar halok bo‘lgan, buning uchun mas’uliyatni esa “Al-Qoida islom Mag‘ribi mamlakatlarida” tashkiloti o‘z zimmasiga olgandi.
Manba. Daryo.Uz